Ragnar Axelsson - SPEGILL LÍFSINS

Ljósmyndir Ragnars Axelssonar vekja hvarvetna athygli. Þær eru í senn hrífandi og forvitnilegar, auk þess að búa yfir djúpu innsæi í þá heima sem í þeim birtast. Á sýningunni í Ljósmyndasafni Reykjavíkur gefur að líta úrval úr þekktustu myndröðum Ragnars frá síðustu þremur áratugum; ekki síst af heimi og lífsbaráttu veiðimanna í Grænlandi, og bænda og sjómanna á Íslandi og í Færeyjum. Einnig gefur að líta ljósmyndir frá Síberíu og úrval einstakra fréttaljósmynda Ragnars víða að, meðal annars Eystrasaltslöndunum við upphaf nýrra tíma, af skipssköðum og náttúruhamförum, auk áhrifamikilla ljósmynda sem sýna þær breytingar sem eru að verða af manna völdum á náttúru norðursins.

Á undanförnum árum hafa bækur með ljósmyndum Ragnars vakið verðskuldaða athygli og lof víða um lönd. Sýningar með verkum hans hafa verið settar upp víða, fjallað um þau í helstu fjölmiðlum, og

honum hefur hlotnast allrahanda heiður fyrir einstaka skráningu sína á mannlífi og náttúru landanna þar sem hann hefur myndað.

Um þessar mundir kemur út ný ljósmyndabók Ragnars Axelssonar í hinni þekktu frönsku ljósmyndabókaritröð Photo Poche. Hérlendis verður bókin gefin út á ensku af útgefanda Ragnars Crymogeu.

Sýningin var á dagskrá Listahátíðar í Reykjavík 2014.