Svifið seglum þöndum
Lifandi og skemmtileg yfirlitssýning um sögu Sjómannadagsráðs þar sem m.a. er fjallað um uppruna Sjómannadagsins, Happadætti DAS og uppbyggingu Hrafnistuheimilanna.
Sýningin er sett upp í tilefni þess að 75 ár eru síðan Sjómannadagurinn var fyrst haldinn hátíðlegur í Reykjavík. Sjómannadagsráð var stofnað árið 1937 og hefur starfsemi þess verið margvísleg en þó ber hæst Sjómannadaginn og uppbygging Hrafnistuheimilanna. Sjómannadagurinn hefur verið haldinn hátíðlegur á Íslandi síðan 1938 og eru honum gerð góð skil í Bryggjusal safnins, þar sem framkölluð hefur verið hátíðarstemning 5. áratugsins. Á sýningunni er rakin forsaga dagsins, þar sem hugmyndin um að efnt yrði til minningadags um drukknaða sjómenn var áberandi. Settur hefur verið upp minningarveggur drukknaðra sjómanna, þar sem að upp eru talin nöfn allra þeirra Íslendinga sem fórust á sjó á síðustu öld, alls 3445 nöfn.
Sjómannadagsráð hefur komið að fleiri málefnum. Segja má að ekkert velferðarmál sjómanna hafi verið því óviðkomandi. Langmikilvægust hafa verið dvalarheimili aldraðra sjómanna, Hrafnistuheimilin. Þau eru nú þrjú talsins í jafn mörgum bæjarfélögum, Reykjavík, Hafnarfirði og Kópavogi. Á sýningunni hafa verið sett upp herbergi vistmanna, annað frá 1960 og hitt frá 2010. Þar sést augljóslega sú mikla breyting sem orðið hefur á þessum 50 árum. Til að reisa Hrafnistuheimilin þurfti mikla fjármuni. Þeirra var meðal annars aflað með frjálsum framlögum einstaklinga og fyrirtækja, sérstaklega fyrstu áratugina. Einnig voru stofnuð tvö fyrirtæki sérstaklega til að afla tekna, Happdrætti DAS og Laugarásbíó, og hafa þau bæði gegnt hlutverki sínu í meira en hálfa öld. Sýningin gerir þessari merkilegu sögu góð skil í bæði máli og myndum.
