Friðrik Örn - 10.000 – dagar með myndavél

Sýning Friðriks Arnar ljósmyndara, 10.000 – dagar með myndavél verður opnuð í Ljósmyndasafni Reykjavíkur hinn18. febrúar 2006. Titill sýningarinnar vísar til þess að 27 ár, eða um tíu þúsund dagar, eru liðnir frá því að Friðrik Örn eignaðist sína fyrstu myndavél þá átta ára að aldri. Myndirnar á sýningunni spanna allt þetta tímabil fram til dagsins í dag.

Sýningin einkennist af mikilli fjölbreytni þar sem ýmsum aðferðum og stílbrigðum er beitt. Að þessu leyti minnir hún um margt á risavaxna úrklippubók þar sem uppsetningin er fjarri því að vera með hefðbundnu sniði. Polaroid-myndir, myndbandsverk, úrklippur, dagbækur, ljósmyndaveggfóður og stórar útprentanir verða meðal annars sýndar auk myndavéla úr fórum ljósmyndarans.

Myndirnar eru margar enda spannar sýningin langan feril og sýnir miklar andstæður í viðfangsefnum og þróun ljósmyndarans sem listamanns.

Friðrik Örn lauk BA-gráðu frá Brooks Institute í Kaliforníu árið 1994 og hefur starfað við atvinnuljósmyndun frá 1991. Hann hefur unnið við auglýsingaljósmyndun, starfað sem ljósmyndari við ýmsar þekktar kvikmyndir, svo sem 101 Reykjavík og Bjólfskviðu, ásamt því að vinna töluvert fyrir leikhús, sjónvarp og með myndlistarmönnum. Allt frá útskrift hefur hann tekið þátt í samsýningum og verið með einkasýningar jafnt erlendis sem hér á landi.