Fjarski og nánd. Íslensk samtímaljósmyndun

Sýningin er unnin í samstarfi við Félag íslenskra samtímaljósmyndara.

Á sýningunni Fjarski og nánd. Íslensk samtímaljósmyndun, heyrast raddir ýmissa þeirra sem sett hafa svip sinn á íslenska samtímaljósmyndun undanfarna tvo áratugi. Hér er gestum boðið að „sjá meira“ og velta fyrir sér hvað gerist þegar lengi er horft á ljósmyndir. Myndirnar hafa verið valdar út frá þeim forsendum að hver einstök mynd talar á sinn sérstaka hátt inn í samtímann. Sumar sýna raunveruleikann á beinskeyttan hátt á meðan aðrar rugla okkur í ríminu. Allar vekja þær til umhugsunar um málefni líðandi stundar og taka ákveðna afstöðu til lífsins og samfélagsins sem við og þær eru hluti af.

Ljósmyndin flöktir á milli hversdagslegra samfélagsmiðla og hins upphafna listrýmis, en í samtímaljósmyndun er tekin afstaða til miðilsins og til sögulegra eiginleika hans. Hún lýsir samtímanum sem sérstöku ástandi sem birtist í síbreytilegum tengslum einstaklingsins við sinn eigin tíma, þar sem hann ýmist samsamar sig eða fjarlægir sig frá honum, oftast í þeim tilgangi að skynja betur tímann sem líður eða jafnvel til að greina hann. Samtímaljósmyndun snýst því um ákveðna úrvinnslu þar sem flakkað er á milli nándar og fjarska, samtíma og fortíðar, minninga og álitamála dagsins í dag.

Sýningarstjóri Æsa Sigurjónsdóttir

Sýningin er sett saman í tengslum við efni bókarinnar Fegurðin er ekki skraut. Íslensk samtímaljósmyndun. Ritstjórar: Sigrún Alba Sigurðardóttir og Æsa Sigurjónsdóttir, Reykjavík: FíSL / Fagurskinna, 2020, 328 bls.

Sýningartími : 20. september 2020 – 10. janúar 2021.

Sýnendur:

Agnieszka Sosnowska
Bára Kristinsdóttir
Bjargey Ólafsdóttir
Bragi Þór Jósefsson
Claudia Hausfeld
Daníel Þorkell Magnússon
Einar Falur Ingólfsson
Guðmundur Ingólfsson
Gunnhildur Hauksdóttir
Hallgerður Hallgrímsdóttir
Katrín Elvarsdóttir
Kristinn Ingvarsson
Kristleifur Björnsson
Orri
Pétur Thomsen
Spessi