Leiðsögn um sýningar

Spjall um sýningar safnsins og hugmyndirnar á bak við þær. Einnig er hægt að óska eftir að fá kynningu á starfsemi safnsins. Í heimsókn á Ljósmyndasafnið fá nemendur innsýn í þær hugmyndir sem sýningin byggir á. Ljósmyndasafn Reykjavíkur setur upp fjölbreyttar sýninga ár hvert. Markmiðið er að kynna íslenska ljósmyndara og koma á framfæri, sýna verk úr safneign sem og að sýna verk erlendra ljósmyndara.

lms_810a9981.jpg

Kennarar geta valið að hefja heimsóknina á stuttri kynningu á starfsemi safnsins áður en hópurinn skoðar yfirstandandi sýningar. Nemendur kynnast þá ólíkum verkefnum safnsins og varðveislu ljósmynda með því að skoða „kontakt“ möppur, bóka- og tímaritakost safnsins.

Hafi kennarar séróskir varðandi heimsóknir á safnið hvetjum við þá til að hafa samband við fræðsluteymi Borgarsögusafns safnfraedsla@reykjavik.is

Núverandi sýning í aðalsal:

20. september 2020 - 10. janúar 2021

Fjarski og nánd. Íslensk samtímaljósmyndun

Sýningin er unnin í samstarfi við Félag íslenskra samtímaljósmyndara og á henni heyrast raddir ýmissa þeirra sem sett hafa svip sinn á íslenska samtímaljósmyndun undanfarna tvo áratugi. Hér er gestum boðið að „sjá meira“ og velta fyrir sér hvað gerist þegar lengi er horft á ljósmyndir. Myndirnar hafa verið valdar út frá þeim forsendum að hver einstök mynd talar á sinn sérstaka hátt inn í samtímann. Sumar sýna raunveruleikann á beinskeyttan hátt á meðan aðrar rugla okkur í ríminu. Allar vekja þær til umhugsunar um málefni líðandi stundar og taka ákveðna afstöðu til lífsins og samfélagsins sem við og þær eru hluti af.